Seán Kyne (Fine Gael) | Oireachtas source

Cuirim fáilte roimh an Aire. Is deas í a fheiceáil ag an gcruinniú seo. Tá cúpla ceist agam maidir leis na Gaelcholáistí agus an Ghaeilge. De réir mo thuisceana, tá a lán rudaí in easnamh sa chreat don pholasaí don oideachas lán-Ghaeilge a chuir an Roinn amach cúpla seachtain ó shín. Níl spriocanna d’fhás na Gaelscolaíochta luaite ná aon ghealltanas ann do liúntas do mhúinteoirí ag oibriú i scoileanna lán-Ghaeilge le haitheantas a thabhairt don obair bhreise a bhíonn le déanamh acu agus chun cuidiú le hearcaíocht sna scoileanna lán-Ghaeilge. Tá a fhios agam gur cuireadh deireadh leis na liúntais sin i rith na géarchéime. An gceapann an tAire go bhfuil sé in am anois, cé go bhfuil an buiséad ag feabhsú, aitheantas a thabhairt do mhúinteoirí sna Gaelcholáistí trasna na tíre?