Ms Lisa Nic Dhoinnléibhe:

I dtaobh an pholasaí seo, tá an dáta istigh. Is 2022 a bhí luaite. De bharr go raibh Covid ann, cuireadh síneadh leis an scéim aitheantais mar chuid den pholasaí sin. Comhthreomhar leis an bpolasaí, tá an Foras Taighde ar Oideachas ag déanamh meastóireachta. Tá sé ag déanamh staidéar taighde agus meastóireachta. Tá ceithre chuid de sin. Tá an chéad chuid curtha i gcrích aige.

Tá dhá thuarascáil eatramhacha atá ar bun faoi láthair. Beidh tuairisc dheireanach le cur aige chugainn. Tá sé ag bailiú eolais ó na scoileanna, tuismitheoirí agus na pobail scoile le fáil amach cad é an tionchar ar an talamh agus an raibh éifeacht leis an bpolasaí. Beidh sé ag cur na dtuairiscí os ár gcomhair amach ionas gur féidir linn iad sin a úsáid agus muid ag dul ag breathnú chun tosaigh ar an gcéad céim eile sa pholasaí.