Mr. Cormac Mac Cashin:

Tá an-chiall ag baint leis an bhfigiúr sin a dhéanamh amach go soiléir. Sílim go bhfuil sé roinnte leis an gcomhchoiste ach i gcuid den taighde atá déanta, ag breathnú ar thuaisceart Áth Cliath, is é sin ón Life suas chomh fada le Baile Brigín, má chuirtear san áireamh an chomparáid idir líon na spásanna atá sna Gaelcholáistí agus an líon daltaí atá ag fágáil na Gaelscoileanna, feictear an bhearna. Tá na Gaelcholáistí in ann 360 páiste a thógáil gach bliain. Is é sin an líon iomlán i ngach Gaelcholáiste. Sa scoilbhliain seo caite, d’fhág 579 páiste rang a sé. Ach an rud atá ann, mar gheall ar na scoileanna atá bunaithe agus scoileanna a bhogann ó foirgneamh ocht rang go dtí 16 rang agus mar sin de, tá an líon daltaí sin chun ardú ó 579 go dtí 774. Bhí 360 spás ann siar deich mbliana ó shin. Ó shin, tá líon na ndaltaí sna Gaelscoileanna ag fás agus ag fás agus tá an pátrún ag leanacht ar aghaidh. Tá na huimhreacha ag fás bliain ar bhliain. In 2023, bhí 4,624 páiste sna Gaelscoileanna i dtuaisceart Áth Cliath agus tá an figiúir sin ag fás go 6,188. Tá a fhios ag an Roinn Oideachais go bhfuil an fás seo ag tarlú.