Aengus Ó Snodaigh (Dublin South Central, Sinn Fein) | Oireachtas source

Luaigh na finnéithe san aighneacht a rinne siad sa ráiteas tosaigh go bhfuil 800 tithe ag teacht. Cheana féin, tá 800 tithe shóisialta agus árasáin tar éis oscailt le bliain anuas i mBaile Átha Cliath 10 agus 12. Tá fás ag teacht ar an daonra cheana féin agus tá a lán suíomhanna, seachas an 800 a luaigh na finnéithe, in áiteanna fáis cosúil le Cherry Orchard. Ní é seo an 70,000 atá ag dul le City Edge i mBaile Átha Cliath 12 ach oiread. Fós, níl éisteacht ná treoir ann conas is féidir le feachtas deonach de thuismitheoirí, seanthuismitheoirí agus a leithéid cuidiú leis na páistí agus an céad glúin eile bunscoil nua a bhunú. Ní chuirfear síneadh le Gaelscoil Inse Chór. Tá sé tar éis ceithre sheomra ranga nua a thógaint cúpla bliain ó shín ach sin é.

Cosúil leis na Gaelcholáistí, tá folúntais agus fadhb bhunúsach ann nuair atá sé soiléir go bhfuil fás ag teacht, ní hamháin ar an éileamh don Ghaelscolaíocht ach ar an daonra cheana féin. Tá sé ar cheann de ceantair atá spéisiúil, mar a luaigh na finnéithe sa ráiteas tosaigh chomh maith, ó thaobh an phlean forbartha don cheantar mar go bhfuil spás ann do trí Ghaelscoil. De bhuntáiste an chinnidh a ghlac an Teachta Joe McHugh agus é mar Aire, níl aon Ghaelscoil ann i mBaile Átha Cliath 10 nó 12.

Caithfear díriú isteach ar an gceist seo. B'fhéidir go ndearnadh eisceacht. Táimid ag lorg eisceacht. Is cuma linn, ach ar deireadh thiar thall ní chóir go mbeidh sé bunaithe ar eisceacht gur seo ceann de na ceantair atá fágtha nach bhfuil aon Ghaelscoil ann. An bhfuil aon duine eile ag iarraidh teacht isteach ar an gceist?