Mr. Ciar?n ? Tiarnaigh:

I mo chás, bhí mé ag fanacht cúig mhí le haghaidh chuntas bainc. Ní raibh mé in ann íocaíocht a ghlacadh d’aon rud. I mo chéad bhliain, bhí a lán rudaí sa phlean nach raibh mé in ann tosú orthu ar chor ar bith. Mar a dúirt Micheál Mac Aoidh, is post an-uaigneach é uaireanta. Buíochas le Dia go bhfuil 30 bliain de thaithí agam ó thaobh iriseoireachta agus saor-iriseoireachta de agus a bheith ag obair i m’aonair. Murach an líonra atá agam leis na hoifigigh pleanála teanga eile, bheinn imithe as. Tá aithne agam ar Mhicheál Mac Aoidh leis na blianta fada trí scoil agus rudaí eile. Tá mé in ann glaoch a chur ar na oifigigh pleanála teanga eile timpeall na Gaillimhe le ceist a chur orthu cad a dhéanaim i gcás áirithe mar níl treoracha leagtha amach.

Luaigh Stiofán Seoighe an méid dualgas atá againn. Seachas an síceolaíocht, rinne mé gach rud eile. Tá a lán le déanamh. Iarrtar orainn a bheith i mbun Facebook agus Twitter agus rudaí a chur suas ar an suíomh Idirlín. Tá rudaí sa phlean cosúil le club óige a bhunú ach b’fhéidir nach bhfuil aon suim ag na daoine áitiúla i gclub óige ar chor ar bith. Cuirtear cúpla mí isteach ag déanamh taighde air agus níl aon aiseolas dearfach ag teacht ar ais agus bogtar ar aghaidh go dtí rud éigin eile. Tá an obair an-shuimiúil ach ní raibh struchtúr ceart ann ó thosaigh muid. Bheadh sé an-deacair do dhuine atá díreach tar éis an ollscoil a fhágáil dul isteach i ról mar sin gan na treoracha a bheith scríofa amach dó nó di.