Ms M?ire Seosaimh?n Breathnach:

Ritheann rud liom. Ní fheadar, mar chuid den athbhreithniú sin, ar labhair sé nó éinne eile leis na heagraíochtaí pobail eile atá ag feidhmiú sna limistéir phleanála teanga ag cur na bpleananna teanga i bhfeidhm. Áirím leis seo coistí Chumann Lúthchleas Gael, scoileanna na gceantar, coistí bailte slachtmhara agus na coistí eile a bhraitheann muidne sna Gaeltachtaí beaga ach go háirithe go mór orthu chun gníomhú agus bearta an phlean a chur i bhfeidhm dúinn. Táimid ag obair i gcomhar leo agus ag tabhairt tacaíocht maoinithe agus riaracháin dóibh. Mar chuid den athbhreithniú, bheadh sé tábhachtach a dtuairimí siúd a bhailiú. Ní dóigh liom go raibh sé sin san áireamh sa chur chuige ach, mar a dúirt Victor Bayda, níor míníodh go hiomlán dúinn riamh cad é an cur chuige ná an cruth a bhí leis ó thús deireadh. Is dóigh liom gur ceart go mbeadh guth an ghnáthphobail, ní hamháin guth sinne atá ag feidhmiú sna ceanneagraíochtaí pleanála teanga agus na comhlachtaí forbartha, san áireamh. Cad a cheapann siadsan faoi phleanáil teanga na gceantar?