Mr. Ciarán Mac Giolla Bhéin:

Labhróidh mé go gasta ar an gceist maidir leis na bailte seirbhíse Gaeltachta a luaigh an Teachta Moynihan. Dar ndóigh, tá saineolas nach beag ag na hoifigigh, ina measc léithéidí Barbara Ní Chathail atá ag plé leis na bailte seirbhíse. Is fiú a rá go rabhamar le chéile faoi choimirce Údarás na Gaeltachta i gCorca Dhuibhne an tseachtain seo caite. Tháinig idir oifigigh líonra ó na limistéir phleanála sa Ghaeltacht agus na bailte seirbhíse Gaeltachta le chéile. Le b'fhéidir bliain anuas, tá obair ollmhór déanta againn i gCiarraí.

Luaigh mé seo ní ba luaithe ach bhíomar ag iarraidh meitheal náisiúnta pleanála teanga a bhunú a ghlacann na sciaranna éagsúla den phleanáil teanga, bíodh sin san iarGhaeltacht in oirthear na tíre, go dtí na Gaeltachtaí agus na bailte seirbhíse. Bhíomar ag iarraidh rud éigin a aithníonn go bhfuil difríochtaí agus éagsúlacht ann maidir leis na dushláin atá os ár gcomhair. Más rud é go bhfuiltear i gCorca Dhuibhne nó in iarthar Bhéal Feirste, is cinnte go bhfuil difríochtaí ann. Ach tá fís chomónta againn dár bpobal agus don teanga agus is é sin an ghrian a bhfuilimid i nGaeilge ag dul thart uirthi, an fhís chomónta seo.