Aengus Ó Snodaigh (Dublin South Central, Sinn Fein) | Oireachtas source

Táimid rite as am. Ní féidir liom na ceisteanna atá agam a chur. Tá brón orm ach tá roinnt acu freagartha cheana féin. Cuireadh léarscáil ar fáil agus is léiriú maith é ar na ceantair ar fad nach bhfuil aon Ghaelscoil iontu. Tá sé tábhachtach nuair atá tuairisc á chur le chéile againn go n-úsáidimid a leithéid. An rud atá i gceist againn ná go ndéanfaimid sraith cruinnithe mar seo le leibhéil difriúla den chóras oideachais, na hollscoileanna san áireamh. Beidh an tAire os ár gcomhair ag deireadh mhí an Mheithimh agus roinnfear na ceisteanna agus na ráitis atá na finnéithe tar éis a thabhairt leis na Teachtaí ar fad. Tá súil agam go mbeidh gach uile ceann de na ceisteanna á gcur díreach ar an Aire. Níl mé ag súil, bunaithe ar gach uair a bhí sí os ár gcomhair roimhe seo, go bhfaighidh mé na freagraí ach ar a laghad cuirfear na ceisteanna. An buntáiste atá leis sin ná go dtuigfidh aon duine a bhfuil spéis acu ó thaobh oideachas de, oideachas trí Ghaeilge nó an tír i gcoitinne cad iad na fadhbanna atá ann agus go mbeimid in ann díriú isteach orthu. Beidh toghchán sár i bhfad agus tá súil agam go mbeimid in ann déileáil le Roinn nár léirigh go dtí seo gur spéis leis cearta daltaí oideachas trí Ghaeilge a bheith acu. Caithfimid an port sin a athrú, is cuma cé atá sa Rialtas. Caithfidh sé sin athrú, ní hamháin mar bhuntáiste do na páistí, na clainne agus don Ghaeilge, ach tá sprioc Rialtais agus sprioc reachtúil ann anois gur gá go mbeadh inniúlacht sa Ghaeilge ag 20% de na daoine atá le hearcú don státseirbhís. Ní féidir leis sin tárlú muna chuireann siad infheistíocht cheart sa Ghaeilge agus a lán eile.

Leis sin, caithfidh mé críoch a chur leis an gcruinniú seo. Gabhaim buíochas le Frainc Ó Clochartaigh, Traolach Ó Donnabháin, Carmel Nic Airt, Niamh Ní Bhroin, Niamh Uí Chléirigh, Vincent Hussey, Joy Coyle agus Cormac McCashin. Cuirimid clabhsúr leis an díospóireacht go dtí an chéad chruinniú eile i seisiún poiblí ar an gCéadaoin seo chugainn i seomra coiste 4 nuair a phléimid pleanáil teanga lasmuigh den Ghaeltacht le hoifigigh pheanála teanga iarthar Bhéal Feirste, Charn Tóchair, Chluain Dolcáin, Bhaile Locha Riacha, Chill Dara, Chorcaigh agus Inse.