Catherine Connolly (Galway West, Independent) | Oireachtas source

Aontaímid ó thaobh cúrsaí neodrachta. Tá gá le polasaí ach ní leithscéal gan rud a dhéanamh é sin. Tá sé sin ráite ag na finnéithe. Is féidir an dá thrá a fhreastal go comhthreomhar. Is é an fhadhb atá agam ná go bhfuil sé ag tógáil an iomarca ama an polasaí sin a fhoilsiú. Sa cheist is déanaí a bhí agamsa, ar an 16 Aibreán, chuir mé an cheist cathain a fhoilseofar an beartas nua. Fuair mé gach rud ach an dáta. Níl aon dáta ó thaobh an pholasaí de sa fhreagra. Ceapaim go ndearna an Roinn Oideachais nó an Rialtas éacht ó thaobh polasaí oideachais don Ghaeltacht. Tá an t-aiseolas atá faighte ar ais iontach dearfach. Tá fadhbanna anseo agus ansiúd ó thaobh acmhainní agus liúntais do mhúinteoirí ach bhí gá leis an bpolasaí. Tá gá leis an bpolasaí toisc go bhfuil bearna ollmhór ann. Táim ag rá é sin agus ní saineolaí mé ach ní leithscéal é. Is é sin an rud atá ag tarlú. Tá gá le dáta. Cén uair a bheidh an polasaí sin foilsithe? Tá sé deacair an t-eolas sin a fháil.

Tá na ráitis léite agam agus d'éist mé leis na finnéithe. Táim beagáinín measctha. Tá líon na ndaltaí agus líon na scoileanna íslithe in ainneoin an éilimh atá ann. Is dea-scéal é go bhfuil éileamh ollmhór ann. Is dea-scéal amach agus amach é sin ach tá bearna idir an t-éileamh agus cur i gcrích ón Rialtas. Tá bearna ollmhór freisin ó thaobh daltaí atá ag freastal ar na bunscoileanna toisc nach bhfuil Gaelcholáistí ann chun leanúnachas a thabhairt dóibh. Tuigim é seo.

Dúirt Caoimhín Ó hEaghra go raibh sé i bhfad níos fearr ag dul siar ach gur athraigh rudaí ansin. Thug sé 2020 nó 2021 mar bhliain dó sin. Thug Clare Spáinneach eolas freisin. Táim ag iarraidh é seo a thuiscint. Bhí córas maith ann a raibh bunaithe ar éileamh agus ar mhian na dtuismitheoirí go dtí go raibh an cúlú eacnamaíochta ann, an raibh? An míneoidh na finnéithe é sin dom? Cad a tharla ansin? Cén chaoi ina raibh sé? Cad a tharla?