Ms R?t N? Theimhne?in:

Bhí mé ag rá níos túisce nuair a bhí mise sa bhunscoil nach raibh éinne eile i mo rangsa a labhair teanga eachtrannach sa bhaile. Labhair mise Spáinnis - labhraím fós le mo mham - agus tá cúlra ilteangach agam. Ní chuireann sé ionadh orm nuair a deir daoine go bhfuil páistí ón Úcráin atá ag labhairt Gaeilge mar táim cinnte go bhfuil níos mó ná teanga amháin ag na páistí sin cheana féin, fiú sular tháinig siad go dtí an scoil in Éirinn.

Chun ceist an tSeanadóra a fhreagairt, is féidir le duine ar bith an Ghaeilge a fhoghlaim ag aon phointe ina saol. Mar a dúirt Laura Pakenham, áfach, cinnte tá sé níos fearr agus iad óg. Caithfear a chur amach ansin sa domhain mór go bhfuil teangacha riachtanach. Ní hamháin go bhfuil siad riachtanach dúinn mar dhaoine, cuireann siad leis an tuiscint atá againn ar an saoil. Má tá níos mó ná teanga amháin agat, tá níos mó deiseanna agat agus níos mó tuisceana agat ar dhaoine agus ar chultúir eile agus chuile shórt mar sin. Ní rud é atá chomh deacair sin nach féidir fiú an iarracht a dhéanamh. Uaireanta, bíonn an míthuiscint ar dhaoine go bhfuil an Ghaeilge chomh deacair nach fiú am a chaitheamh ar bheith ag breathnú ar TG4. Deirtear nach féidir an teanga a thuiscint, go bhfuil sí ró-chasta agus is rud í nach mbaineann leo. Ach níl sé sin fíor. Feicimid freisin go n-éiríonn go han-mhaith leis na páistí gurb as cúlraí éagsúla dóibh le teangacha go ginearálta. Is é sin an ghnáth rud a bhí mé ag labhairt faoi níos túisce. Dar le staitisticí ó Eurostat, tá dhá theanga ag 35% de dhaoine sa saol oibre san Eoraip agus níos mó ná dhá theanga ag 21%. Tá Éire taobh thiar ina thaobh sin. Mar a bhí mé ag rá, ceapann daoine sa tír gur rud eisceachtúil é a bheith dhátheangach ach ní shin an cás ar chor ar bith.