Ms Laura N? Aoidhne:

Le cur leis an méid atá ráite ag Rút Ní Theimhneáin agus ag an Teachta maidir leis an mbearna idir an aos óg agus an tseanaois agus an Ghaeilge. Luadh an Ghaeilge mar ábhar scoile chomh maith. Tá mise sa chás céanna leis na cailíní agus an Teachta féin. Níor fhreastail mé ar bhunscoil nó meánscoil lán-Ghaeilge. Bhí an Ghaeilge agam mar ábhar scoile. Ní raibh seans agam ach an oiread freastal ar chúrsa samhraidh ar chor ar bith ach fós phioc me an Ghaeilge mar ábhar sa bhunchéim.

Thosaigh mo thuras leis an nGaeilge ar an ollscoil. Nuair a bhí mé ar an ollscoil, bhí mé i mo chónaí ar an scéim cónaithe agus d'oscail sé sin an ghrá ionam don Ghaeilge agus chur sé deiseanna ar fáil. Tá mé fós chomh mór leis na daoine a bhuail mé leis ar an scéim cónaithe is a bhí ansin. B’é sin an chéad uair a d'fhreastail mé ar Ghaeltacht ar chor ar bith. Is as Bealach Féich mé i nDún na nGall, giota beag fada ón nGaeltacht, agus an chéad Ghaeltacht a fhreastal mé air ná Gaeltacht Ráth Chairn. Is as Ráth Chairn do Saoirse Nic Aogáin. Bhí mé faoi gheasa aige. Níor chreid mé ar chor ar bith caidé a bhí i gceist leis an nGaeltacht agus níor chreid mé an cultúr a bhí le feiceáil i Ráth Chairn nuair a chuaigh mé ann. Bhí siad ag damhsa, ag canadh agus ag labhairt Gaeilge i mbealach chomh normálta ach níor chreid mise go raibh sé chomh normálta sin. Bhí an t-atmaisféar sa Ghaeltacht dochreidte. Ó shin, oibrím sa Ghaeltacht achan lá anois. Mar a lua Cuán De Búrca, bímid ag dul chuig an siopa agus labhraíonn achan duine Gaeilge lena chéile. Ní dóigh liom go bhfaigheann achan duine an deis sin. Ní raibh mé muiníneach ar chor ar bith agus mé ag labhairt Gaeilge, cosúil le an-chuid daoine sa tír. Mura bhfuil tú muiníneach agus rud éigin á dhéanamh agat, tá seans maith ann nach ndéanfaidh tú é agus is trua é sin. Nuair a chuirtear deiseanna ar fáil dúinn chun ár gcuid Gaeilge a fheabhsú agus a fhorbairt, feabhsaíonn sé. Tagann an muinín agus ansin bímid ar fad lánsásta Gaeilge a labhairt lena chéile. Is minic a chloisimid daoine ag rá gur bhreá leo a bheith in ann Gaeilge a labhairt. Má chuirtear na deiseanna sin ar fáil - cosúil leis na coláistí samhraidh, na Gaelcholáistí agus an intéirneacht atá muid ag déanamh - ceapaim go mbeadh sé sin galánta.