Aengus Ó Snodaigh (Dublin South Central, Sinn Fein) | Oireachtas source

Tá sé sin go maith agus tá i bhfad Éireann níos mó ag teastáil chun cuidiú leis sin. Tá ceist eile agam atá sórt gaolta le sin. Is é seo an áit a thagann an dual mandate chun cinn uaireanta, nuair atáimid ag déileáil le hábhar amháin agus ábhar eile. Ní thagann COGG, an Chomhairle um Oideachas Gaeltachta agus Gaelscolaíochta, faoi chúram an Aire Stáit ach déanann sé a lán oibre ó thaobh leabhair Ghaeilge a sholáthar do scoileanna agus ábhair a sholáthar do mhúinteoirí. I gcásanna eile áfach, titeann an t-ualach ar an Aire Stáit cuidiú leis an Roinn Oideachais nó preabadh a thabhairt dó roinnt rudaí a dhéanamh. Is fiú féachaint ar na scéimeanna atá ag an Roinn Oideachais agus b’fhéidir iarraidh ar an Aire, an Teachta Foley, cuidiú a thabhairt nuair atá ganntanais sna scéimeanna atá dírithe ar mhúinteoirí, ar na leabhair, agus spéis a chur i léamh leabhar. Má thagann sé ón scoil, léifidh na daltaí lasmuigh agus beidh buntáistí ann dúinn ar fad.