Aengus Ó Snodaigh (Dublin South Central, Sinn Fein) | Oireachtas source

Tá súil agam go mbeidh sé sin sa tuairisc nuair atá sé críochnaithe agus go mbeidh an tAire Oideachais ag déileáil leis sin agus ag déanamh cinnte go mbeidh buntáistí ann amach anseo. Tá buntáistí ann ina lán bealaí difriúla. Is léir dúinn ar fad inár gnáthshaoil go bhfuil buntáistí ann ina lán bealaí difriúla. Ní gá gur buntáistí airgeadais a bhíonn i gceist i gcónaí.

Leis sin ráite, cuirfidh mé deireadh leis an gcruinniú seo. Gabhaim buíochas leis an Dr. Aodhán Mac Cormaic, le Sadhbh Ó Cinnseala, agus le Emily Maloney as ucht bheith anseo. Go n-éirí go maith leo leis an gcoiste sna blianta romhainn. Ansin feicfimid i gceann cúig bliana iad, an ea? Bhí sé spéisiúil agus bhí sé go maith an dul chun cinn atá á dhéanamh acu a chloisint. Cuirfidh mé clabhsúr leis an díospóireacht inniu.

Níl aon ghnó eile againn. Beidh cruinniú do Roghchoiste na Gaeilge, na Gaeltachta, agus Phobal Labhartha na Gaeilge ar siúl maidin amárach ar 9.30 a.m. i seomra coiste 2, nuair a phléifear Meastacháin Fhorlíontacha le haghaidh seirbhísí poiblí 2023, Clár C, don Ghaeltacht, de Vóta 33 na Roinne Turasóireachta, Cultúir, Ealaíon, Gaeltachta, Spóirt agus Meán, agus buiséad TG4, leis an Aire Turasóireachta, Cultúir, Ealaíon, Gaeltachta, Spóirt agus Meán, an Teachta Catherine Martin, agus le hAire Stáit sa Roinn Turasóireachta, Cultúir, Ealaíon, Gaeltachta, Spóirt agus Meán maidir leis an nGaeltacht, an Teachta Patrick O'Donovan. Tá sé i gceist go mbeadh cruinniú príobháideach againn an tseachtain seo chugainn chun déileáil le, agus críoch a chur, leis an tuairisc atá againn maidir le ceist na díolúintí. Chomh maith leis sin, tá sé i gceist go rachadh toscaireacht ón gcoiste seo go dtí Acaill tráthnóna amárach agus ar an Aoine.