Catherine Connolly (Galway West, Independent) | Oireachtas source

Gabhaim buíochas leis an gCathaoirleach agus guím fáilte roimh ár n-aíonna. Táimid ar ais arís. Gabhaim míle buíochas leis an Roinn as a ráiteas tosaigh agus as an tuilleadh eolais a thug sí dúinn. Tá sé an-chabhrach. Bhí mé déanach. Gabh mo leithscéal faoi sin mar bhí mé sa Chathaoir sa Dáil. Tá sé beagáinín deacair mo mheon a athrú agus dul ar ais i mbealach troda mar go bhfuil gá le troid ó thaobh na Gaeilge de, gan aon dabht.

Táim ag breathnú ar an Acht. Dúirt an Dr. Mac Cormaic ina ráiteas tosaigh gur treisiú ar an mbunAcht a bhí ann. Is dócha gurb é sin croílár na ceiste, i ndáiríre, mar bhí gá le treisiú. D'éirigh ar bhealach srianta le hAcht na dTeangacha Oifigiúla, 2003 agus thóg sé 20 bliain chun é a threisiú mar ní raibh sé ag oibriú. Tá neart cloiste againn anseo ón gCoimisinéir Teanga faoin gcaoi inar theip go huile is go hiomlán ar na scéimeanna teanga chomh maith lena lán rudaí eile.

Chun bheith dearfach faoi, is maith an rud go bhfuil tuilleadh fógraíochta le cloisteáil ar na meáin chumarsáide. Tá sé sin iontach do mo mheon féin agus chun dóchas a thabhairt dúinn. Sílim gur céim an-mhaith é sin.

Ag dul ar aghaidh go dtí an ról atá ag an gcoiste comhairleach, bhí mé ag breathnú ar an Acht. Bhíomar chomh fada sin ag labhairt faoi Bhille go bhfuil sé deacair a bheith ag caint faoi Acht ag an bpointe seo. Ar a laghad, tá sé againn. Chuireamar, agus an Cathaoirleach go háirithe, neart leasuithe isteach ann, go háirithe ó thaobh fógraíochta de. Bhí an próiseas deacair ach ceapaim go raibh fiúntas ag baint leis.

Táimid anseo anois maidir leis an gcoiste comhairleach. Is dócha go bhfuil ar a laghad sé leathanach ina iomlán tugtha don ról atá ag an gcoiste comhairleach. Taispeánann sé sin cé chomh tábhachtach is atá sé. Uimhir a haon, agus ba chóir go mbeadh an t-eolas seo agam cheana, ach cé hé nó cé hí cathaoirleach an choiste?