Ms Sadhbh ? Cinnseala:

Chun cur leis sin, ba cheart a mheabhrú leis an gcomhchoiste gur gá dúinn a bheith ag breathnú ar bhealaí nuálacha ar fad le daoine a mhealladh isteach agus le muinín a thabhairt do dhaoine a bheith ag obair trí mheán na Gaeilge. B'fhéidir go bhfuil siad ar leibhéal ar leith ach nach mbraitheann siad ag leibhéal sách ard le bheith ag déanamh na hoibre sin. Sa chomhthéacs sin, táimid ag breathnú ar mhúnlaí atá ann, mar shampla sa Bhreatain Bheag, áit a bhfuil deis ag duine snas a chur ar an teanga agus iad sa phost. Tá múnlaí eile ar fáil, mar shampla i gCeanada, áit ina mbeadh meantóir teanga ag an duine, nó rud éigin mar sin, nuair a thiocfaidís isteach san eagraíocht. Táimid ag breathnú ar bhealaí eile go mbeadh cúrsa i nGaeilge le déanamh uair sa bhliain. Nuair a thagann daoine isteach, b'fhéidir nach mbíonn siad i ról ina bhfuil an Ghaeilge á húsáid acu an t-am ar fad agus go n-imíonn an snas ar an teanga tar éis tréimhse ama. Táimid ag breathnú ar rudaí mar sin chun muinín a thabhairt do dhaoine agus iad a spreagadh le coinneáil leis an nGaeilge.

Is gné eile de sin ná, mar a luaigh an Dr. Mac Cormaic, ag an tús go bhfuil sé i gceist againn deontas a cheadú le líonra Gaeilge a bhunú. Beidh sé sin le bunú go luath san athbhliain agus ar fáil chun tacú le daoine, le foghlaimeoirí agus le cainteoirí Gaeilge laistigh den chóras. Is pacáiste iomlán é. Tá na cúrsaí Gaeilge ann ach tá súil againn go mbeidh na líonraí Gaeilge ann agus go mbeidh na daoine in ann tacú lena chéile sa chomhthéacs sin, mar aon le bheith ag breathnú ar bhealaí eile chun tacú le daoine sna róil sin.

Maidir le TEG, tá bealaí éagsúla ann. Déanann daltaí meánscoile TEG mar chuid den idirbhliain, mar shampla, faoi láthair. Tá go leor rudaí nuálacha ann agus atá á dtriail ar bhonn píolótach, mar a luaigh an Dr. Mac Cormaic ansin. D'fhoghlaim an Roinn go leor ón deireadh a cuireadh leis an maolú san AE agus bhí gá le rudaí nua a thriail nuair a bhíomar ag obair go dlúth lenár gcomhghleacaithe sa Bhreatain Bheag. Dúirt siad go gcaithfimis rudaí a thriail, is nach n-éireofaí le gach rud. Is é sin an áit ina bhfuilimid faoi láthair.