Dr. Aodh?n Mac Cormaic:

Is é an rud eile ná an scéim TEG atá ina scéim phíolótach do mhúinteoirí agus d'oibrithe luathoideachais, a luaigh mé leis an Teachta Ó Cuív. Má oibríonn sé sin, beidh na staitisticí againn agus an taighde sa scéim phíolótach sin ag an deireadh a léireoidh dúinn go mbeimid in ann rud éigin comhionann leis sin a dhéanamh sa chóras Stáit go ginearálta. Osclaíonn sé sin deiseanna nua suas dúinn. Mar a luaigh mé, má chruthaímid go n-oibríonn an coincheap seo, beimid in ann ansin, ach na hacmhainní a bheith curtha ar fáil dúinn, é sin a dhéanamh ar scála i bhfad Éireann níos mó. Tá céimeanna tógtha le bliain anuas ag eascairt as obair an choiste agus an aonaid chun dul sa treo sin agus má léirítear go n-oibríonn sé sin, beidh féidearthacht an-mhaith ansin chun é a thabhairt isteach.

Bhí cúpla ceist eile ag an Teachta agus ceist ann maidir le cúrsa sa riarachán poiblí trí mheán na Gaeilge. Chuirfimis fáilte roimhe sin. Tá a fhios agam go bhfuil ollscoil amháin, ar a laghad, ag breathnú ar an gceist sin faoi láthair le fáil amach an bhfuil féidearthacht ann. Mar a luaigh Sadhbh Ó Cinnseala anseo, is í sin ceann de na ceisteanna a bheimid ag breathnú uirthi mar chuid den athbhreithniú ar an tionscnamh ardscileanna Gaeilge. Bheinn muiníneach go maith go dtiocfadh sé sin amach mar cheann de na moltaí sin.

Anuas air sin, tá an scéim printíseachta a luaigh mé ar ball. Táimid ag iarraidh, ní hamháin go mbeimid ag tabhairt na cainteoirí Gaeilge isteach agus ag cur barr feabhais ar a gcuid Gaeilge agus a scileanna scríofa Gaeilge, go háirithe, ach go mbeimid ag cur modúl eile ar fáil sa riarachán poiblí agus sa chuntasacht phoiblí. Is iad scileanna eile sin a chruthaíonn tóir ar na daoine seo i measc na seirbhísí poiblí mar go mbeidh daoine ag teacht agus ag cuardach na daoine seo toisc go mbeidh sainchúrsa ar leith déanta acu. Is meascán a bheidh ann maidir le cuid de na modúil sin de bharr go mbeidh roinnt díobh ar fáil sna hollscoileanna trí mheán na Gaeilge agus cuid acu trí mheán an Bhéarla. Ag deireadh an lae, is é an rud is tábhachtaí ná go mbeidh na scileanna teanga acu agus go mbeidh na scileanna eile acu freisin.

Feictear domsa go bhfuil deis ann. Mar a luaigh mé níos túisce, tá na doirse ag oscailt an t-am ar fad dúinn. De réir mar atáimid ag caint le daoine, is iad sin na doirse nua atá ann. Feicimid go bhfuil deis ansin.

Bhí ceist eile maidir leis an-----