Dr. Aodh?n Mac Cormaic:

Ba mhaith liom an bhunlíne a fheiceáil ar dtús. Is é sin an líon daoine atáimid ag caint faoi. Ná déanaimis dearmad freisin go bhfuilimid ag caint faoi dhaoine atá taobh istigh. Is é sin an bhrí a bhain Oifig an Choimisinéara Teanga as an Acht, is é sin go bhfuilimid ag caint faoi dhaoine atá taobh istigh den chóras freisin. Dá réir, má fhaigheann duine ardú céime atá ag obair sa chóras Stáit cheana ar an mbunús go bhfuil an teanga acu agus go gcomhlíonann siad na critéir atá leagtha síos, gurb ionann go mbeidh daoine mar sin mar chuid den chéatadán freisin. Nílimid ag caint mar sin faoi earcaithe nua amháin anseo; táimid ag caint faoi dhaoine atá istigh sa chóras freisin.

É sin ráite, is cuimhin liom nuair a bhíomar ag plé leis an iar-Thaoiseach, Enda Kenny, ag an am, tráth a bhí an Teachta McHugh thart, nó b'fhéidir, an Seanadóir Kyne féin, bhí daoine an-éadóchasach faoin straitéis agus faoi na spriocanna a bhí leagtha amach chun deireadh a chur leis an maolú earcaíochta san Eoraip, ar scála i bhfad níos lú ach le daoine a bhí thar a bheith oilte. Bhí dúshlán difriúil ann ach bhaineamar amach é trí bhreathnú go nuálach ar na bealaí agus bhí orainn go leor oibre a dhéanamh leis na hinstitiúidí Eorpacha. Cuireadh coistí agus foghrúpaí ar bun. Maidir le go leor de na rudaí seo, d'athraigh EPSO an córas a bhí acu le daoine a earcú agus d'athraigh, fiú amháin, na hinstitiúidí féin chun go n-earcódh siad daoine sealadacha. Cuireadh go leor córas nua agus nuálach i bhfeidhm an t-am sin. Is éard a bhíonn á rá agamsa leis an gcoiste comhairleach i gcónaí, agus deirimse leis an gcoiste seo inniu freisin, go gcaithfimid tabhairt faoin dúshlán seo ar an mbealach céanna, ag breathnú go nuálach. Má táimid chun na seanchórais atá ann a úsáid, teipfear orainn. Caithfimid breathnú ar bhealaí nua agus is é sin an rud atá á dhéanamh againn le printíseachtaí, le hintéirneachtaí, le scoláireachtaí and all that kind of thing. Táimid dóchasach go maith ach ba mhaith liom an bhunlíne a fheiceáil ar dtús.