Dr. Aodh?n Mac Cormaic:

Feictear domsa go bhfuil athrú meoin trasna an córais Stáit. Bhí mé ag plé leis an gcineál oibre seo ar feadh achar an-ghairid thart ar dheich mbliana nó níos mó ó shin agus is cuimhin liom bualadh ar chuid de na doirse céanna agus nach raibh mé ag fáil freagra. Dá bhfaighinn freagra, chaithfí amach mé tar éis a chloisteáil faoin ábhar a bhí ann. Táimid agus bhíomar ag reáchtáil seimineáir go rialta d'fhostaithe an Stáit chun iad a chur ar an eolas faoin obair atá ar bun. Fuaireamar 1,000 duine ó cheann de na seimineáir agus fuaireamar 600 ó cheann eile. Go ginearálta, feictear dúinn go bhfuil athrú meoin ansin. Beidh eisceachtaí ann ach, go ginearálta, tá daoine ag aithint go bhfuil fadhb ann agus go bhfuilimid ag iarraidh teacht ar réiteach na faidhbe sin, nó réitigh na faidhbe sin, agus go bhfuil na daoine seo ag iarraidh tacú linn ar an aistear sin.

Luafaidh mé freisin obair an choiste agus go bhfuil ceann amháin de na fochoistí bunaithe againne idir an Roinn Caiteachais Phoiblí, Seachadta PFN agus Athchóirithe agus an tSeirbhís um Cheapacháin Phoiblí, agus é sin curtha ar bun cheana féin againn. Táimid ag bunú ceann teicniúil anois agus beidh cruinniú againn ag deireadh na seachtaine.

Táimid ag dréachtú téarmaí tagartha d’fhochoiste teicniúil chun breathnú ar an dúshlán mór atá ann leis na sínte fada agus na hainmneacha i nGaeilge agus na rudaí uilig sin atá leagtha amach sna forálacha atá ag le teacht isteach anois roimh dheireadh na bliana. Caithfear féachaint freisin ar na córais teicneolaíochta faisnéise atá ag an Stát agus go mbeidh go leor acu le hathnuachan le dul i ngleic leis an bhfadhb seo. Tá an foghrúpa seo chun breathnú ar an gceist ar leith seo agus, cheana féin, táimid tar éis cuid de na comhlachtaí móra atá timpeall ón bhoird againn ar an gcoiste comhairleach, ar nós na Roinne Coimirce Sóisialaí agus An Gharda Síochána, a chuir faoi chineál test case. Chuireamar teimpléad chucu agus bhí siad toilteanach breathnú ar a gcuid córas féin, féachaint cad iad na dúshláin atá bainteach leis na córais atá acu mar réamhobair sula dtéimid amach go dtí an córas Stáit uilig. Tugann sé deis dúinne breathnú ar na dúshláin atá ag na comhlachtaí Stáit is mó atá ann agus ansin beimid in ann, b'fhéidir, breathnú ar leasuithe a dhéanamh ar an teimpléad sula dtéann sé amach go ginearálta.

Táimid ag fáil an-tacaíocht, caithfidh mé a rá, timpeall an bhoird ag an gcoiste comhairleach, ach, go ginearálta, trasna an chórais Stáit. Tugann sé dóchas domsa anyway.