Éamon Ó Cuív (Galway West, Fianna Fail) | Oireachtas source

Tuigim é sin ach déarfaidh muintir Fhánada an rud céanna. Déarfaidh chuile Ghaeltacht, muintir Acla agus muintir Cheathrú Thaidhg, é sin. Mar sin, caithfidh muidne, mar pholaiteoirí, a bheith réidh mar nuair atá sibhse imithe beidh dream eile ag teacht isteach againn. Níl mé ag iarraidh a bheith ag argóint faoi seo ach is fearr go mbeadh plé macánta faoi mar caithimid a bheith réalaíoch. Ní déarfaidh mé níos mó inniu.

B'fhéidir go gceapann na finnéithe go bhfuil mé thar a bheith diúltach ach níl mé. Caitear cuimhneamh gur mhéadaigh mé an bord. Bhí seachtar tofa agus bhí seisear ainmnithe ar an gcéad bhord - is é sin 13 duine - ach mhéadaigh mise go 20 é. Bhí go leor daoine maithe ann mar gur theastaigh uaim ionadaíocht níos leithne a thabhairt do phobal na Gaeltachta. Bhí fadhbanna leis sin ach ar an taobh eile den scéal bhí teorainn, go praiticiúil agus go polaitiúil, le cé chomh fada is a bhféadfaí dul le méid an bhoird. Bhí daoine ag rá fiú go raibh 20 ró-mhór. Níor cheap mise go raibh; cheap mise go raibh an bord ag feidhmiú níos fearr ná an bord le deich mbliana anuas. B'shin é mo thuairim pearsanta ach dúirt go leor go raibh mise as mo chiall agus as mo mheabhair ar fad leis sin. Níl mé ag iarraidh na finnéithe a chur ag argóint liom le go bhfaighimid réiteach na faidhbe seo mar níl sé éasca é a réitigh.