Ms F?ona de Buis:

Ceann de na staitisticí a sheasann amach ó thaobh tithíochta, agus seans go bhfuil sé seo amhlaidh i gCorca Dhuibhne chomh maith, ná go bhfuil 1,773 duine ina gcónaí i gceantar Ghaeltacht Uíbh Ráthaigh agus tá 1,818 tigh folamh ann. Sin tithe saoire agus tithe atá díreach folamh, ach is tithe iad go bhféadfadh daoine a bheith ina gcónaí iontu. Cuireann sé sin croit ar an áit. Is dúshlán an-mhór é sin agus mar a deirim, dá mbeadh freagracht ag an údarás ó thaobh cúrsaí tithíochta de, mholfainn go mór go mbeadh sé istigh ansin mar atá sa cheantar Gaeltachta in Albain, mar shampla. Is dóigh liom go mbeadh sé ina chabhair an-mhór.

Faoi láthair tá coistí pobail i mBaile an Sceilg, i gCathair Dónaill, sa Ghleann agus sa Choireán. Tá siad timpeall ar fad agus tá a fhios acu an éigeandáil atá ann ó thaobh cúrsaí tithíochta. Tuigeann siad go maith cad í an éigeandáil agus cad iad na deacrachtaí agus na constaicí ach níl faic gur féidir a dhéanamh muna bhfuil talamh ar fáil. Sin ceann de na deacrachtaí is mó. Dá mbeadh an chumhacht sin ag an údarás, chabhródh sé an-mhaith le teacht i gcion ar an saghas éigeandála atá sa cheantar againn.