Catherine Connolly (Galway West, Independent) | Oireachtas source

Tuigim ach tuigim freisin go bhfuil níos mó dualgas ar an údarás gan an acmhainn cheart a bheith aige. Níl na dualgais chéanna ar an dá eagraíocht eile. Tá siad in ann díriú isteach ar chúrsaí fostaíochta. Tá an t-údarás in áit na leathphingine i ndáiríre toisc go bhfuil tríonóid na ndualgas air. Ní saineolaí mé ach, i mo thuairim, tá sé dírithe isteach ar chúrsaí fostaíochta. Tuigim é sin toisc nach mbeidh aon teanga ann gan fhostaíocht ach, ag an am céanna, ní bheidh aon teanga ann má leanaimid ar aghaidh gan coinníollacha ó thaobh cúrsaí teanga sna monarchana agus sna hionaid oibre.

Mar a dúirt an Teachta Moynihan, tá téama na tithíochta tagtha suas go mion minic anseo. Níl mé den tuairim go mba chóir go mbeadh dualgais phleanála ar Údarás na Gaeltachta. Ar aon nós, ní tharlóidh sé thar oíche. Táimid ag caint anseo faoi Bhille srianta gearr chun toghcháin a thabhairt ar ais ach, sa chomhthéacs sin ó thaobh cúrsaí tithíochta, tá ról ag an údarás faoi láthair cur in iúl do na húdaráis áitiúla cé chomh deacair is atá sé tithe a thógáil nó tithe a fháil. Óna thaithí féin, an féidir le Micheál Ó hÉanaigh soiléiriú a thabhairt ar cé chomh minic is a bhain an t-údarás úsáid as an ról sin? An bhfuil aon cháipéisí le feiceáil? An bhfuil aon rud le feiceáil thar na blianta ina gcuireann an t-údarás in iúl don dá údarás áitiúil go bhfuil sé beagnach dodhéanta lonnaíocht a chothú sna Gaeltachtaí uilig? Ba mhaith liom é sin a chloisteáil.

Tá dhá rud dheireanach agam. Luaigh Anna Ní Ghallachair Maidrid ó thaobh cúrsaí daonlathais agus teangacha. An dtiocfaidh sí ar ais go dtí sin? Bhí suim agam ann. Rinne mé dearmad ar rud eile freisin. Tá coinníollacha teanga ann ó thaobh cúrsaí tithíochta sna Gaeltachtaí ach, i mo thaithí, nuair atá forbairt mhór i gceist, níl béim ar bith ar chúrsaí teanga. Ní féidir teach a thógáil gan na coinníollacha a chomhlíonadh ach is féidir teach a cheannach gan aon choinníollacha teanga. Tá rud amháin ag teacht salach ar an rud eile. An bhfuil sé sin fíor?