Marc Ó Cathasaigh (Waterford, Green Party) | Oireachtas source

Gabhaim buíochas leis na finnéithe as a gcur i láthair agus as a taithí shaibhir a roinnt linn. Is iomaí taithí atá acu ar an ábhar seo. Tá na ceisteanna céanna ag teacht aníos seachtain i ndiaidh seachtaine. Tá inniúlacht sa Ghaelainn i gceartlár na ceiste. Chuir an tAire, an Teachta Harris, dúshlán roimh gach éinne san Oireachtas le déanaí. Táimid i mbliain Eorpach na scileanna. Is é an dúshlán a chuir sé roimh gach aon duine ná scil nua a fhoghlaim le linn na bliana seo. Tá mé féin chun é a chur romham an teastas sin a bhaint amach chun a fháil amach cá bhfuil mé, bíodh sé ar leibhéal B1, B2 nó áit eile, agus tuiscint níos fearr a fháil ar a bhfuil i gceist sa scrúdú sin. I might have company on the road.

Tá ceist chasta le réiteach ó thaobh cé acu go mbeadh vóta acu. Tá a lán cainte faoi chathair na Gaillimhe. Ar chóir go mbeadh vóta ag an gcathair? Tá an cheist chéanna againn i bPort Láirge. Baineann sé le líon na ndaoine atá ina gcónaí laistigh de Ghaeltacht na nDéise. Níl Gaelainn ó dhúchas ag an tromlach dóibh. Ar chóir go mbeadh vóta ag daoine sin i dtoghchán an údaráis? B’fhéidir nach bhfuil Gaelainn ag na tuismitheoirí ach tá na gasúir ag dul go dtí na scoileanna agus go dtí an Cumann Lúthchleas Gael agus tá siad ag labhairt Gaelainne ansin. Ar chóir go mbeadh vóta ag na daoine sin? Ba chóir. Is é sin mo thuairim phearsanta

Is í an cheist eile atá casta – tá sé léirithe ag Anna Ní Ghallachair – ná go bhfuil teannas ann ó thaobh an dualgais go mbeadh ionadaíocht ó gach ceantar Gaeltachta ach leis sin, go mbeadh cothromaíocht ó thaobh inscne de. Níl sé soiléir domsa ar chor ar bith i gcinnteidil an Bhille seo conas go réiteoimid an teannas sin. B’fhéidir go bhfuil smaoineamh ag na finnéithe ar conas gur féidir linn é sin a réiteach.