Aengus Ó Snodaigh (Dublin South Central, Sinn Fein) | Oireachtas source

Tá dhá sheisiún againn inniu. Leanfaidh an chéad cheann ar aghaidh go dtí 3.30 p.m., más gá. Tosóidh an dara ceann ag 4 p.m. agus leanfaidh sé sin ar aghaidh go dtí 5.30 p.m., más gá. Tá leithscéal faighte againn ón Seanadóir Ó Donnghaile.

Fearaim fáilte roimh chomhaltaí an chomhchoiste, roimh aon Chomhaltaí eile atá ag freastal ar an gcruinniú inniu, roimh na finnéithe a bheidh á labhairt linn i gceann tamall beag agus roimh ár lucht féachana ar sheirbhís teilifíse an Oireachtais. Aithním go bhfuil roinnt de na baill ag teacht isteach go fíorúil ar Microsoft Teams, is iad sin, an Teachta Pádraig O'Sullivan, an Teachta O'Dowd agus an Seanadóir Kyne. Nuair a thosaigh muid an cruinniú, bhí an Teachta Ó Murchú linn chomh maith. Is mian liom a chur ar an taifead go bhfuil na finnéithe ag freastal ar an gcruinniú ó sheomra coiste 4 taobh istigh de phurláin Thithe an Oireachtais.

Sula dtosaím an seisiún seo, caithfidh mé na rialacha seo a leanas a léamh. Meabhraím do chomhaltaí, mé féin san áireamh, na fóin a mhúchadh toisc go gcuireann siad as do na córais chraolacháin agus taifeadta anseo i dTithe an Oireachtais. Tá an rogha ag comhaltaí freastal ar an gcruinniú go fisiciúil sa seomra coiste nó go fíorúil ar Microsoft Teams ar an gcoinníoll, i gcás cruinnithe phoiblí, gur óna n-oifigí i dTithe an Oireachtais a dhéantar sin. Is riachtanas bunreachtúil é sin. Má tá comhaltaí atá ag freastal óna n-oifigí ag iarraidh caint, caithfidh an físeán a bheith ar siúl. Ní ligfear comhaltaí isteach sa chruinniú chun caint muna bhfuil. Nuair nach bhfuil comhaltaí ag caint, caithfidh a micreafóin a bheith múchta chun déanamh cinnte de nach gcuireann siad as don chuid eile den chomhrá.

Cuirim ar aird na bhfinnéithe inniu go bhfuil siad, de bhua Bhunreacht na hÉireann agus reachtaíochta araon, faoi chosaint ag lánphribhléid maidir leis an bhfianaise a thugann siad don chomhchoiste chomh fada agus atá siad lonnaithe laistigh de phurláin Thithe an Oireachtais agus an fhianaise sin á tabhairt acu. Molaim d'fhinnéithe a bheith cúramach agus fianaise á tabhairt acu. Má ordaíonn an comhchoiste dóibh éirí as fianaise a thabhairt i leith ní áirithe, ba chóir go ndéantar amhlaidh láithreach. Ordaítear dóibh gan aon fhianaise a thabhairt nach fianaise í a bhaineann le hábhar na n-imeachtaí atá á bplé ag an gcomhchoiste. Ba chóir dóibh a bheith ar an eolas go gcuirfear na ráitis tosaigh a chuir siad ar fáil don chomhchoiste ar shuíomh gréasáin an chomhchoiste tar éis an chruinnithe.

Iarrtar ar fhinnéithe agus ar chomhaltaí araon an cleachtadh parlaiminte a urramú nár chóir, más féidir, daoine nó eintiteas a cháineadh ná líomhaintí a dhéanamh ina n-aghaidh, ná tuairimí a thabhairt maidir leo ina ainm, ina hainm nó ina n-ainmneacha ar shlí a bhféadfaí iad a aithint. Chomh maith leis sin, iarrtar orthu gan aon ní a rá a d’fhéadfaí breathnú air mar ábhar díobhálach do dhea-chlú aon duine nó eintiteas. Mar sin, dá bhféadfadh a ráitis a bheith clúmhillteach do aon duine nó eintiteas aitheanta, ordófar dóibh éirí as an ráiteas sin láithreach. Tá sé ríthábhachtach go ngéillfí leis an ordú sin láithreach.

Déanfaimid tús a chur leis an díospóireacht ar an ábhar atá á phlé againn inniu, is é sin, grinnscrúdú réamhreachtach ar cheannteidil an Bhille um Údarás na Gaeltachta (Leasú), 2022. Os ár gcomhair inniu, tá Anna Ní Ghallachair, iarchathaoirleach bhord Údarás na Gaeltachta, agus Micheál Ó hÉanaigh, atá ina iarchathaoirleach ar bhord Údarás na Gaeltachta freisin. Iarraim ar Anna Ní Ghallachair tús a chur leis an seisiún inniu.