Ms Sorcha N? Ch?illeachair:

Ó thaobh caint faoin údarás sa ghnáthphobal, is dócha go bhfuil an Teachta ag caint faoin toghchán agus faoin mBille seo. Tá caint ann. Bhí comhráite móra fada agamsa le daoine faoi seo. Cuireann sé ionadh orm a laghad aighneachtaí a cuireadh isteach sa phróiseas comhairliúcháin a bhí ar bun faoin mBille seo, b’fhéidir an t-am seo an bhliain seo caite. Tá mé ag ceapadh go raibh 27 ann nó rud éigin. Shíl mé go mbeadh i bhfad níos mó ná sin. Chuir sé sin an-ionadh orm. B’fhéidir gur cheart ceisteanna a chur maidir leis an bhfáth a bhí leis sin.

Cuireann sé ionadh orm chomh maith faoin méid a dúradh ag tús an chruinnithe go bhfuil drogall ar dhaoine teacht anseo os comhair an chomhchoiste seo. Ní fheadar faoin líon aighneachtaí a fuair an comhchoiste. Cuireann sé iontas orm mar tá caint i measc an phobail. Bhí an-chuid cainte san am atá caite faoi chúrsaí toghcháin. Chuir sé spleodar sa phobal agus chuir sé daoine ag caint faoi chúraimí an údaráis agus faoin údarás féin. Cuireann sé ionadh orm nach bhfuil níos mó daoine ag teacht chun cinn go dtí an leibhéal seo. B’fhéidir go bhfuil rud breise ansin agus gur bhain sé leis an gcaint a rinne duine an tseachtain seo caite chomh maith.

An bhfuil scáth ar dhaoine b'fhéidir labhairt faoi mar go bhfuil siad faoi chúram an chórais agus go gceapann siad nár cheart labhairt amach faoi na rudaí seo? Ní fheadar mé.

Maidir leis na cumhachtaí breise, tá sé sin luaite agam cheana ó thaobh comhairle contae faoi leith a bheith i gceist maidir le hÚdarás na Gaeltachta. B’fhéidir nach é an t-údarás a bheadh i gceist ach go mbeadh údarás éigin oideachais sa Ghaeltacht chomh maith.

Luaigh an Teachta Ó Cuív cúrsaí cúraim leanaí, cúrsaí pobail agus na deontais a fhaightear maidir le cúrsaí cúraim leanaí agus nach bhfuil aon choinníoll teanga leo siúd, mar shampla, faoi láthair agus go mbeadh na héilimh mar sin faoi chúraim údarás Gaeltachta ionas go mbeadh ár gcearta bainte amach againn.

Ní hé go bhfuilimid ar son a thuilleadh ionadaithe ach go ndúirt mé go mb'fhéidir go mbeadh sé sin i gceist dá mbeimis ag iarraidh go mbeadh ionadaíocht chothrom ag na háiteanna is mó ina labhraítear Gaeilge.

Maidir leis na daoine a bheidh ceaptha ag an Aire, ba cheart dó sin a bheith trédhearcach chomh maith. B'fhéidir go bhfuil an baol ann gur ceapacháin pholaitíochta a bheadh i gceist agus ba cheart é sin a sheachaint.