Éamon Ó Cuív (Galway West, Fianna Fail) | Oireachtas source

Is é an fáth gur tháinig TEG B2 ar aghaidh – tá an Cathaoirleach eolasach air seo freisin – ná go raibh droch-stair ag scrúduithe Gaeilge an Stáit ag dul i bhfad siar. Mar shampla, bhain foghlaimeoirí nach raibh ach trí fhocal Gaeilge acu na scrúduithe seo amach cé nach raibh siad in ann feidhmiú sa Ghaeilge. Bhíomar thíos leis nuair a bhíomar ag iarraidh seirbhíse trí Ghaeilge. Is de bharr sin gur tháinig an rud seo ar fad faoi chaighdeán TEG B2 le haghaidh fostaithe Stáit. Is é an fáth go bhfuil sé tarraingteach ná gur caighdeán Eorpach atá ann agus mar sin, tá sé cineál neamhspleách ar cur isteach áitiúil.

Luaigh mé leis an gCathaoirleach go mb’fhéidir gur cheart dúinn labhairt le muintir na Breataine Bige agus muintir Cheanada maidir leis an gcaoi a láimhseálann siadsan a gcuid caighdeán teanga. Tá a fhios agam go bhfuil trí chaighdeán leagtha síos i gCeanada agus bíonn an Státchóras leagtha síos air. Cén chaoi a ndéanfar é? Tuigim an rud atá ag rá ag Sorcha Ní Chéilleachair ar lámh amháin, ach ar an lámh eile tá faitíos orm mar gheall ar an rud a tharla.