Ms Sorcha N? Ch?illeachair:

Is ea, ach bhí ionadaíocht mhaith ann. Bhí an tuairimíocht ann go raibh ionadaíocht mhaith ann an uair dheireanach. Bhíomar an-bhuíoch den mhéadú sin thíos sa Rinn, mar shampla, mar gur chinntigh sé go raibh ionadaíocht bhuan ag An Rinn ar bhord an údaráis. Tá ceantair ann faoi láthair amhail na hoileáin, Uíbh Ráthach, Oileán Chléire agus na ceantair sin ar fad, agus níl sé cinnte go mbeidh aon ionadaíocht acu sin ríomh ar an údarás. Ní mór féachaint air sin chomh maith.

Tuigim cad atá i gceist ag an Teachta maidir leis na cáilíochtaí ach is é an rud a bheinn ag rá - tagraíonn sé seo leis an méid a raibh le rá ag an Ollamh Conchúr Ó Giollagáin an tseachtain seo caite - ná go bhfuilimid i gcónaí ag díriú ar an bhfoghlaimeoir. Táimid ag díriú sa chás seo ar an duine atá ag iarraidh mí-úsáid a bhaint as an gcóras. Más rud é go bhfuilimid i gcónaí ag díriú ar an bhfoghlaimeoir – caithfimid díriú orthu – agus ar na daoine seo atá ag iarraidh mí-úsáid a bhaint as an gcóras, beidh na daoine cearta thíos leis dá bharr. Sin í an imní agus sin é an t-amhras a bheadh ormsa. Níl saol na Gaelainne nó na Gaeltachta chomh mór sin nach mbeadh aithne agat ar dhuine nó nach mbeadh a fhios agat go bhfuil a dhóthain Gaelainne aige nó aici lena chuid cúraimí a dhéanamh trí Ghaelainn nó suíochán a fháil ar bhord an údaráis.