Éamon Ó Cuív (Galway West, Fianna Fail) | Oireachtas source

Bhí baint agam le roinnt reachtaíochta cheana agus sin mar a rinneamar agus ansin aistríodh í. Ní a mhalairt de bhealach é. Bhí an leagan Gaeilge i bhfad níos fearr dá bharr.

Ag an gcomhairle contae, pléitear rudaí go hoscailte. Ag bord an údaráis faoi láthair, táthar thar a bheith rúnda. Níl a fhios agam an bhfeiceann Sorcha Ní Chéilleachair fadhb leis seo ach ba mhaith liom a barúil. Bhí jab eile aicise mar iriseoir agus bhíodh sí ag freastal ar na cruinnithe seo. D’fhéadfaí na tograí sonracha a chuirtear ar aghaidh a phlé go príobháideach ach ní fheicimse fadhb ar bith maidir leis an bpolasaí mar is Údarás na Gaeltachta a bhí ann. Sin a troideadh ar a shon - gur údarás in úinéireacht phobal na Gaeltachta a bheadh ann, seachas bord Stáit sa ghnáthchiall, agus go bpléifí ceisteanna polasaithe go neamhbhalbh agus go hoscailte amach go poiblí. Cá bhfuil ár dtreo? Cuirfidh duine éigin ceist céard í an difríocht nó cé acu is mó a bhfuil cumhacht acu, na feidhmeannaigh nó an bord. Dar liomsa, tá cumhacht iomlán ag an mbord taobh istigh den dlí an polasaí a leagan amach agus caithfear glacadh le comhairle. Feidhmíonn an feidhmeannas. Tagann an focal “feidhmeannas” as dream a chuireann rud i bhfeidhm. Tá dualgas ar an eagraíocht sin na rudaí a chur i bhfeidhm. Braithim, mar dhuine atá ag cónaí sa Ghaeltacht agus baint agam le cúrsaí Gaeltachta, gur lú an bhaint atá ag an údarás le pobal Gaeltachta agus is lú úinéireachta atá ag an bpobal ar an údarás le hais mar a bhí ó d’imigh an bord tofa. Bhíodh na raiceanna go breá agus bhíodh corr argóint ann ach ní raibh dochar ar bith ansin mar le rud atá beo beidh an cineál sin coimhlint ann. Ba mhaith liom barúil an fhinné air sin. Táimid le seans amháin a fháil air seo agus caithfimid éisteacht go géar leis an méid atá á rá. B’fhéidir gur mhaith leis an bhfinné machnamh a dhéanamh ar chuid de na ceisteanna agus, le cead an Chathaoirligh, go bhféadfadh sí aighneacht nó freagra scríofa a chur ar ais maidir leo.