Lorraine Clifford-Lee (Fianna Fail) | Oireachtas source

Tá fáilte roimh Shorcha Ní Chéilleachair. Tá sé go hiontach í a fheiceáil ar ais arís agus Gaelainn deas na nDéise a chloisteáil arís sa seomra coiste. Casfaidh mé ar ais ar chúrsaí inscne. Gabhaim buíochas léi as na moltaí atá aici. Tá sé ar eolas againn go mbíonn fadhbanna faoi leith ag mná lasmuigh de na cathracha maidir le cúrsaí toghcháin. Bunaíodh an eagraíocht See Her Elected chun díriú isteach ar na ceantair tuaithe agus níos mó ban a mhealladh isteach sa chóras agus seasamh le haghaidh toghcháin éagsúla timpeall na tíre. Tá an fhadhb sin ag baint leis na toghcháin sin freisin. Mar is eol dúinn go léir is ceantair iargúlta iad den chuid is mó agus beidh fadhbanna faoi leith ag na mná.

Tá an-suim agam san fhóram sin agus caithfimid, mar choiste, díriú isteach ar an moladh sin agus níos mó a chur leis. Bíonn na cúig C i gceist mar a dtugtar orthu i mBéarla, is iad sin, airgead, cúram leanaí, féinmhuinín, cultúr agus roghnú iarrthóirí. Mhol Conradh na Gaeilge cuóta a chur i bhfeidhm cosúil leis an cuóta atá i bhfeidhm faoi láthair maidir leis na toghcháin Dála. An aontaíonn Sorcha Ní Chéilleachair leis an moladh sin?

Maidir le hairgead, is í an fhadhb a bhíonn ag mná maidir le cúrsaí airgid agus maoinithe ná go bhfuil bearna phá inscne ann. Bímid go léir ag déileáil leis na fadhbanna a bhaineann leis sin. Cad a cheapann Sorcha Ní Chéilleachair faoi mhaoiniú ó Údarás na Gaeltachta a chur ar fáil do mhná, go díreach chuig na mná iad féin atá sásta seasamh don toghchán, nó an bhfuil maoiniú indíreach i gceist aici?