Aengus Ó Snodaigh (Dublin South Central, Sinn Fein) | Oireachtas source

Tá ceithre comhalta i láthair, Teachta agus Seanadóir san áireamh, mar sin is féidir linn tús a chur leis an gcruinniú. Leanfaidh sé ar aghaidh go dtí 4.30 p.m. más gá. Ní fheictear dom go sroichimid an t-am sin. Níl leithscéal ar bith faighte againn.

Fearaim fáilte roimh na comhaltaí, roimh aon chomhalta eile atá nó a beidh ag freastal ar an gcruinniú, roimh na finnéithe atá le labhairt os ár gcomhair inniu agus roimh ár lucht féachana ar sheirbhís teilifíse an Oireachtais. Fearaim fáilte ach go háirithe roimh Sorcha Ní Chéilleachair, ceannasaí Thuismitheoirí na Gaeltachta. Tá fáilte roimpi agus táim buíoch di as ucht a bheith anseo. Táim buíoch freisin de Thuismitheoirí na Gaeltachta as glacadh leis an gcuireadh chun cuidiú linn inár mbreathnú ar cheannteidil an Bhille um Údarás na Gaeltachta (Leasú), 2022.

Ba mhaith liom aithint go poiblí go bhfuil Tuismitheoirí na Gaeltachta tar éis a bheith an-chabhrach, le linn an ama atá mé mar Chathaoirleach ar an gcoiste seo, leis an obair atá ar bun againn sa chomhchoiste. Gabhaim mo bhuíochas leo as sin.

Tá an Bille seo, nó na ceannteidil ar aon chaoi, an-tábhachtach ó thaobh todhchaí na Gaeltachta i mo thuairim féin agus, dar ndóigh, i dtuairim an Rialtais mar tá sé tar éis na ceannteidil a fhoilsiú. Caithfimid iarracht a dhéanamh nuair atáimid ag déanamh an ghrinnscrúdaithe seo ar na ceannteidil gach uile eagras is féidir linn a thabhairt os ár gcomhair chun cuidiú linn maidir lenár gcur i láthair agus maidir leis na moltaí a dhéanfaimid don Aire, sula bhfoilsíonn sí an Bille i gceart, faoi conas an Bille a thabhairt chun críche ar mhaithe le pobal na Gaeltachta. Go dtí seo, mór an trua, níl an oiread sin de na heagrais phobail tar éis cuireadh a ghlacadh teacht os ár gcomhair. Chomh maith le Tuismitheoirí na Gaeltachta, beidh Comhchoiste Ghaeltacht Uíbh Ráthaigh, Forbairt na Dromoda Teoranta agus Comharchumann Chorca Dhuibhne os ár gcomhair. Níor ghlac na comharchumainn eile leis an gcuireadh go dtí seo.

Bhí dreamanna eile le teacht os ár gcomhair le cuidiú leis an iarratas a ndearna an tAire orainn díriú isteach ar conas ar féidir linn cothromas inscne a fháil in Údarás na Gaeltachta. Ní raibh See Her Elected nó Women in Politics in ann teacht os ár gcomhair go dtí seo agus níor chuir siad aon aighneacht faoinar bhráid. Má tá deis ag aon duine nó má tá cairde ag aon duine sna heagrais sin, iarraim orthu impí orthu cuidiú linn díriú isteach ar an gceist a chur an tAire orainn faoi conas ar féidir linn cothromas a chothú, nó a chruthú, tríd an gcóras toghchánaíochta atá leagtha amach againn.