Catherine Martin (Dublin Rathdown, Green Party) | Oireachtas source

Rinne mé dearmad a rá go bhfuil sé molta ag an gcoimisiún athbhreithniú cuimsitheach a dhéanamh ar an soláthar Gaeilge laistigh de 18 mí mar aitheantas ar an tábhacht atá leis an nGaeilge agus ar an gcastacht a bhaineann leis an mbealach is fearr í a chur chun cinn. Díreofar san athbhreithniú ar na róil atá ag TG4, ag RTÉ agus ag Raidió na Gaeltachta, maraon le soláthraithe eile ábhar i dtaobh ábhar Gaeilge a chur ar fáil. Is é Coimisiún na Meán a thabharfaí faoin athbhreithniú agus ba chóir go ndéanfaí deiseanna comhoibrithe i measc soláthraithe éagsúla ábhar a fhiosrú le linn an athbhreithnithe sin. Ba chóir go ndéanfaí deiseanna earcaithe agus do nuálaíochtaí digiteacha a fhiosrú chomh maith. Chas mé le duine de na coimisinéirí le gairid atá ag cur clabhsúir faoi láthair ar an gclár oibre don bhliain atá romhainn. Tuigim go bhfuil Coimisinéir Forbartha na Meán i mbun athbhreithnithe agus é ag iarraidh tús a chur leis an obair seo chomh luath agus is féidir. Ní dóigh liom go mbeadh sé ceart teacht roimh obair Choimisiún na Meán ina leith seo nó roimh aon mholtaí a chuirfidh siad ar aghaidh. Is athbhreithniú tábhachtach é seo atá le déanamh ag Coimisiún na Meán.