Éamon Ó Cuív (Galway West, Fianna Fail) | Oireachtas source

Ní bheidh mé i bhfad. Cuirim fáilte roimh na finnéithe agus gabhaim míle comhghairdeas leo as an gcur i láthair. Cinnte, tá fadhbanna sa chóras sláinte. Ní chreidim, in aon rud a bhíonn ar bun ag an duine daonna, go gcríochnóimid riamh le córas atá go hiomlán gan locht. Ní fhaca mé rud ar bith mar sin riamh nach raibh locht ar bith air. An cheist ná an féidir linn é a dhéanamh níos fearr. Tá rudaí maithe sa chóras sláinte s’againne. Tháinig mé trasna orthu mar go raibh duine gar dom ag brath go mór ar an gcóras sláinte le bliain. Bhí rudaí áirid go dona ach rudaí eile go maith. Bheadh sé thar a bheith spéisiúil, idir na scoileanna i dTír Eoghain agus na scoileanna ó Dheas, dá bhféadfaí comparáid a dhéanamh idir rudaí ó Thuaidh agus ó Dheas. Mar shampla, tá gach rud saor ó Thuaidh, agus ó Dheas íocann daoine €80 sa mhí as drugaí má tá a n-ioncam os cionn méid áirid. Táimid ag cur deireadh le táillí ospidéil ach íocann daoine ar an dochtúir má tá a n-ioncam ard freisin. De réir mar a thuigim, ó Thuaidh agus i Sasana má tá duine ag iarraidh dul ag an dochtúir teaghlaigh nó an dochtúir áitiúil, b’fhéidir go mbeadh orthu fanacht coicís le dochtúir a fheiceáil. An áit ina bhfuil mise i mo chónaí amuigh faoin tuath, dá nglaofainn ar an dochtúir inniu agus dá mbeadh an fliú orm, d’éireodh liom dul ag an dochtúir amárach. Bheadh sé spéisiúil comparáid a dhéanamh agus féachaint cé acu córas is fearr. Ansin, d’fhéadfá na píosaí is fearr den rud ó Thuaidh agus na píosaí is fearr den rud ó Dheas a thógáil agus iad a chur le chéile agus na drochrudaí ó Thuaidh agus ó Dheas a chaitheamh amach. Sin a cheapaimse gur cheart a dhéanamh.