Mr. Alan Esslemont:

Má bhreathnaítear ar na scannáin ar fad atá déanta, tá siad ar fad ar ardchaighdeán. Maidir leis an gceann a luaigh an Teachta ansin, bhí go leor a bhí difriúil faoi agus bhí sé suimiúil gur sa Ghearmáin i dtosach a bhfuair sé duais mhór idirnáisiúnta. Baineadh stangadh as daoine ansin in Éirinn agus, chomh luath agus chonaic siad an scannán, bhí a fhios acu go raibh fiúntas ann. Tá sé feicthe trí huaire agam. Den chéad uair bhí mé ag caoineadh. Den dara huair, dúirt mé liom féin go raibh an plota oibrithe amach agam. Den tríú huair, bhí mé ag caoineadh arís mar go bhfuil sé chomh láidir mar scannán agus, go háirithe, mar go bhfuil an cailín beag a rinne an príomhpháirt, Catherine Clinch, thar cionn.