Mr. Tadhg Mac Dhonnag?in:

Níl saineolas agam ar an mBreatain Bheag ach tá a fhios agam go bhfuil go leor oibre déanta agam mar fhoilsitheoir ó thaobh leabhair do pháistí a chur chun cinn thar lear. Tá ár gcuid leabhar foilsithe, is é sin leabhair phictiúr do pháistí óga in 14 teanga ar fud na cruinne. Tá cuid mhaith eolais bailithe agam i gcaitheamh na mblianta.

Níl rudaí chomh láidir sin is é shamhlófaí i dtíortha móra agus, ar bhealach, is míorúilteach é an leibhéal aicsin atá againn in Éirinn i saol na leabhar Gaeilge, nuair a smaoinítear air. Táimid ar fad ag rá go bhfuil na foilsitheoirí go mór faoi bhrú de bharr easpa mhaoinithe agus foirne. Is easpa foirne an fhadhb is mó agus baineann le heaspa mhaoinithe.

Mar shampla, tá aithne agam ar aistritheoir Iodáilise a bhíonn ag plé le haistriúcháin liteartha go hIodáilis agus bíonn sí ag obair le cuid de na foilsitheoirí a bheadh ag obair ar an scála céanna le cuid de na foilsitheoirí is mó Gaeilge cosúil le Cló Iar-Chonnacht, ag a bhfuil cúigear nó seisear d’fhoireann. Ní hiad na foilsitheoirí is mór san Iodáil ach is foilsitheoirí suntasacha iad mar sin féin agus tá siad ag plé leis an litríocht. Bhí an t-aistritheoir seo ag rá liom go bhfuil ar an meán thart ar 400 cóip de leabhar liteartha a gcuirfí i gcló san Iodáilis. Nuair a smaoinítear air, cé mhéad cainteoirí dúchais Iodáilise atá ann? Tá na milliúin díobh ann, ar a laghad 60 milliún, agus b'fhéidir go bhfuil níos mó ná sin ann. Tá 75,000 cainteoir laethúil Gaeilge againne agus le cuid mhaith leabhar, foilsítear 1,000 cóip ina chéad chló. Is dócha go dtógann sé píosa ama le go ndíolfar 1,000 le roinnt de na leabhair sin ach tarlaíonn sé go mbíonn athchló curtha ar leabhair. I gcás leabhair do pháistí, tá sé i bhfad níos láidre ná sin. Bíonn 2,000 nó 2,500 cóip go minic ar an gcéad cló.