Mr. Liam Carson:

Tagraím arís don easpa foirne. Tráth dá raibh, bhí an Dublin Writers’ Festival ann - the International Literature Festival Dublin atá air anois - agus ní raibh imeachtaí Gaeilge ar bith ann. Tháinig roinnt daoine chugam ag rá gur cheart feachtas a bheith againn taobh amuigh de Halla na Cathrach agus chomhairle na cathrach agus gur cheart dúinn ionsaí a dhéanamh orthu. Dúirt mé nach ndéanfaimis é sin agus go raibh rud níos fearr le déanamh. Chuir mise scairt ar an stiúrthóir chun suí síos liom le haghaidh cupán caife. Dúirt mé leis go bhféadfainn cuidiú leis agus go bhféadfaimis comhoibriú le chéile. Bhí an taithí agam ar shaol litríochta na Gaeilge. Agus dúirt mé go bhféadfainn imeachtaí den scoth a eagrú dó, ach amháin go raibh air ardán a thabhairt dom. Bhí seisean breá sásta é sin a dhéanamh.

Níl ionam ach duine amháin. Ba cheart go mbeadh triúr nó ceathrar ag caint leis na féilte agus ag rá go bhfuil pacáiste againn agus gur féidir imeacht den scoth a eagrú. D’eagraíomar imeachtaí dátheangacha freisin. Mar shampla, ag an Dublin Writers’ Festival thugamar téama do na scríbhneoirí - Baile Átha Cliath san oíche: an chathair faoi scáth na hoíche. D’iarr muid ar bheirt fhile i nGaeilge agus beirt i mBéarla dánta nuachumtha a scríobh faoi shaol na cathrach san oíche. Bhí ceoltóirí snagcheoil againn freisin. Bhíomar sa Sugar Club le breis agus 200 duine i láthair. Tá féidearthachtaí ann ach ní féidir le scríbhneoirí na hÉireann a bheith ag brath ar IMRAM amháin. Ba cheart go mbeadh i bhfad níos mó i gceist.