Éamon Ó Cuív (Galway West, Fianna Fail) | Oireachtas source

Chaill mise cuid den mhéid a bhí le rá. Tá dhá cheist agam a bhaineann le muintir Chonamara. Tá caint ar an teicneolaíocht. Níl an oiread sin dochar sa teicneolaíocht má ghintear an leictreachas go nádúrtha. Cén bharúil atá ag na scoláirí maidir leis an moladh seo atá ann muilte gaoithe a chur amach ar charraigeacha na Sceirde thiar i gCarna?

Bíonn caint ar an mbithéagsúlacht, rud a chuimsíonn go leor rudaí ar nós plandaí agus mar sin de a bhíonn ag fás. An ndearna éinne de na daoine óga atá anseo riamh aon phlé leis na seandaoine maidir leis an éagsúlacht a bhí sa bhfeirmeoireacht a bhí ar bun acu? Bheadh cairéid, biabhóga, fataí, oinniúin, scailliúin, tornapaí, piseáin agus mar sin de ag an gcuid is mó acu. Níl siad sin ag fás in aon áit i gConamara anois. An ceart go mbeadh, mar shampla, €1,000 sa mbliain do chuile fheirmeoir dá gcuirfidís garraí beag de na rudaí seo le spreagadh a thabhairt dóibh an bhithéagsúlacht a thabhairt ar ais? Tá ceist dheireanach agam. Dá mbeadh seirbhís bhus ó Ros Muc go Gaillimh gach uair a chlog, an mbainfeadh na finnéithe úsáid aisti seachas ag dul sa gcarr i gcónaí?