Mr. Éanna Ó Caollaí:

Ba cheart go gcruthófaí creat ar leith a bheadh neamhspleách agus a chuirfeadh maoiniú nó struchtúr ar fáil chun cabhrú le céimithe óga gur mian leo a gceird nó an iriseoireacht a chleachtadh i nGaeilge. D’fhéadfaí é sin a chur ar fáil sa chaoi chéanna go gcuirtear intéirneachtaí agus a leithéid sin ar fáil d’iriseoirí gur mian leo tús a chur lena ngairm i mBéarla. Bheadh suim ag daoine ina leithéid de rud. Tá go leor daoine ann gur mhaith leo a bheith ag scríobh agus ag tuairisciú i nGaeilge. Bíonn an t-uafás plé ar na meáin shóisialta i nGaeilge chuile lá agus bheinn ag súil leis go mbeadh fonn ar dhaoine bheith páirteach ansin. Téann sé seo ar ais arís ag an droichead faoinar labhair mé, mar is ceist í seo faoin Ghaeilge a chur i láthair an phobail mhóra. Bheinn ag súil leis go ndéanfadh sé sin amhlaidh.