Ms Fiona Uí Uiginn:

Mar iar-phríomhoide scoile, is dóigh liom go bhféadfaí rogha 1 a bheith níos tarraingtí dom. Bheadh sé níos éasca é a chur ar fáil sa scoil, go háirithe, dá mbeinn i gceannas i scoil T2 mar is minic agus mé ag múineadh i scoileanna T2 gur mhúin mé bonnleibhéal agus gnáthleibhéal sa seomra céanna. Is dóigh liom go n-aontódh an tUasal Ó Coinn liom leis sin. Cuirtear béim ar rudaí agus le ham breise, agus is teagasc difriúil é. Dá mbeadh méid áirithe coiteann den litríocht idir ardleibhéal agus an sárleibhéal ach go mbeadh breis le déanamh, bheadh sé níos éasca i scoil T2 é sin a chur ar fáil le tréimhse nó dhó breise sa tseachtain do na daltaí sin. Dá mba rud é go rabhthas ag caint ar rogha 2, saíocht agus litríocht na Gaeilge, rud a bheadh an-suimiúil agus ar ardchaighdeán, chaithfí cúig thréimhse sa tseachtain ar leith a thabhairt do rang mar sin. Bheadh níos mó deacrachtaí clár ama i gceist. Déarfainn go mbeadh níos lú scoileanna T2 a chuirfeadh na hacmhainní isteach ansin, agus dá bhrí sin ní bheadh an líon céanna daltaí ag tabhairt faoi.

Níl ansin ach mo thuairim agus, arís, d’fhéadfaí taighde a dhéanamh bunaithe air sin. Dá mba rud é, ámh, go raibh an obair seo déanta i dtosach sular cuireadh na dréachtsonraíochtaí seo amach, bheadh daoine ag smaoineamh orthu. Cuireadh an teimpléad os ár gcomhair agus níor iarradh orainn an raibh aon teimpléad eile ann.