Mr. Gearóid Mac Donncha:

Is rud é seo atá déanta le blianta fada againn. Is é an samhradh an deis is mó atá againn saoire a ghlanadh agus sos a thabhairt do dhaoine. An rud a rinne muid, agus an bealach is éifeachtaí é sin a dhéanamh, ná laghdú a dhéanamh ar an sceideal agus tarlaíonn sé sin le "Nuacht a hAon". Ó thús Mheithimh – bhuel, deireadh Mheithimh nó tús Iúil i mbliana – go dtí tús Mheán Fómhair, baineann muid "Nuacht a hAon" den aer. Ligeann sé sin dúinn beagáinín spáis a bheith againn agus muid ag iarraidh chuile shórt eile a choinneáil ag imeacht, ar nós "Adhmhaidin" agus na deasca eile ar fad atá ann. Táimid ag fuineadh de réir na mine níos mó ná tada eile.