Catherine Connolly (Galway West, Independent) | Oireachtas source

Tá dualgas ar RTÉ faoin reachtaíocht. Tá an dualgas sin sáraithe. Tá na finnéithe ag iarraidh é a chur i gceart anois. Glacaim leis sin. Is dócha go bhfuil easpa tuisceana ó thaobh an fhinné chomh fada is atá dualgas dlíthiúil ar RTÉ. Tá na fadhbanna á lua ag na finnéithe. Tuigimid go léir na fadhbanna ach tá deiseanna iontacha acu freisin ó thaobh na foirne atá acu chun í a úsáid. Níl an dara rogha acu ach an Ghaeilge a chur i lár an aonaigh agus í a dhéanamh níos feiceálaí. Ón méid atá feicthe agamsa, níl sé sin á dhéanamh, go háirithe ar na príomhchláir, chun a chur in iúl do mhuintir na tíre go bhfuil an Ghaeilge ar an leibhéal céanna.

Is é ceann de na bealaí is éasca ná an fhoireann atá acu a úsáid. Is é Béarla uile atá in "Nationwide", in ainneoin go bhfuil sé ráite go gcloistear focal Gaeilge anois is arís. Tá foireann ann le Gaeilge ansin. Cén fáth nach féidir clár nó leath den chlár a chur trí Ghaeilge nó, ar a laghad, tús a chur le hagallamh i nGaeilge, nuair atá daoine le Gaeilge líofa acu faoi agallamh. Bhí dhá agallamh i gceist le déanaí, ceann amháin maidir le Seán Ó Riada agus ceann eile maidir leis na Blascaodaí. Is mór an náire é nach raibh siad trí Ghaeilge. Tá neart samplaí eile freisin. Bhí deis iontach ag RTÉ an t-agallamh a dhéanamh trí Ghaeilge. Cén fáth nach ndearnadh é sin?