Ms Niamh Ní Churnáin:

Bhí sraith sé clár againn le "Ar an Sliabh" agus beidh sin críochnaithe an tseachtain seo ach tá ábhar eile Gaelainne ag imeacht isteach ina áit. An rud a bhíonn againn ná oíche Dé Luain bíonn ábhar ón aonad neamhspleách agus oíche Dé Máirt bíonn ábhar ón aonad atá lonnaithe taobh istigh de RTÉ. An uair dheireanach a chuir an coiste ráiteas amach maíodh go raibh spriocanna ar leith aige agus ceann de na spriocanna a bhí molta ag an gcoiste ná go ndéanfaí aonad lánaimseartha arís den aonad taobh istigh de RTÉ. Rinneadh sin mar chuid den chéad phlean a chuireamar ar aghaidh go dtí an Coimisinéir Teanga. Anois tá 13 uair an chloig á léiriú taobh istigh de RTÉ. Sin an méid chéanna a bhíonn ar bun ag an roinn faisnéise Béarla.

Tuigim go mbeadh duine ag ceapadh nach bpuinn 13 uair an chloig ach tá go leor oibre i gceist ann agus tá an obair sin déanta agam féin le blianta. Bhíodh mé ag obair mar léiritheoir agus tá sé deacair agus tá dua ag baint le cláir fhaisnéise leathuair an chloig a dhéanamh. Bhí an jab sin i bhfad níos deacra le bliain go leith anuas. Tá a fhios agam go bhfuil an uimhir íseal ach tá go leor oibre i gceist chun é sin a bhaint amach.