Aengus Ó Snodaigh (Dublin South Central, Sinn Fein) | Oireachtas source

Tuigim sin ach léiríonn sin gur cuma leis. Tá sé ag cur na fógraí suas ar an mbus agus caithfidh go bhfeictear go bhfuil na comharthaí eile ar chúl an bhus i nGaeilge agus go dhátheangach. Tá níos mó den sórt rud sin ag tarlú. Tá súil agam, nuair a bheidh an Bille rite mar Acht, go mbeidh cur chuige cuibheasach tapa ann ó thaobh an státchórais go mbeidh athrú meoin ann nó beimid ar ais ag éisteacht le tuarascáil faireacháin ón gcoimisinéir. Tá súil agam go mbeidh cumhacht sa reachtaíocht, ní hamháin chun monatóireacht a dhéanamh, ach freisin chun faireachán a dhéanamh ar na polasaithe atá ag teacht.

Déanaimid clár reachtaíochta ag tús gach uile téarma. Tá deich gcomhlacht nua le bunú má ritear na Billí sin ar fad. Tá siad ar fad luaite i mBéarla sa chaipéis sin. Uaireanta, bunaítear na comhlachtaí seo i ngan fhios dúinn agus ní bhíonn ach teideal Béarla acu. Má thosnaítear ar tús le TII nó Gas Networks Ireland, fanann na téarmaí sin i gcloigne daoine. Nuair a bhí mise óg, Córas Iompair Éireann agus Bus Átha Cliath a bhí ann ach tá athrú tar éis tarlú. Caithimid tosnú leis an teideal ó thús agus ansin tá aitheantas níos fearr ann agus tá sé níos soiléire agus níos craobhscaoilte ná mar atá na teidil atá ar chomhlachtaí Stáit faoi láthair.