Catherine Connolly (Galway West, Independent) | Oireachtas source

Tá an deis seo á tapú agam mar níl daoine eile anseo. Maidir le cúrsaí ar líne, de réir mar a thuigim níl cúrsaí nuachta ar fáil ar líne ar an deireadh seachtaine. An bhfuil aon smacht ag Alan Esslemont maidir leis sin nó an mbaineann sé le RTÉ?

Maidir leis an mbriseadh nuachta, gabhaim buíochas le Alan Esslemont maidir leis an bhfrása “briseadh nuachta”. Cén fáth nach bhfuil sé ar fáil i nGaeilge agus nach bhfuil sé sin tarlaithe mar ní thuigim é sin?

Maidir leis an gceist a chuir an Seanadóir Clifford-Lee maidir le criúnna ceamara mar bhí daoine i dteagmháil linn maidir leis seo, an bhfuil cinneadh déanta ag RTÉ nó an bhfuil sé in ann é sin a rá? An mbeidh ceamara ar fáil le nuacht TG4 a chlúdach ar an deireadh seachtaine? Ní thuigim é sin mar tá sé chomh casta sin agus ba mhaith liom é a shimpliú ionas go mbeidh mé in ann é a thuiscint agus a rá le daoine.

Faoi dheireadh, maidir le “súil eile” a bheith ag TG4, tá baol ann gurbh é an rud atá le teacht ná an tsúil cheannann chéanna mura ndéanfaimid cearta a chinntiú. Bheinn buíoch dá bhféadfadh ár n-aíonna tabhairt faoi na pointí beaga sin.