Catherine Connolly (Galway West, Independent) | Oireachtas source

Glacaim leis sin. Tá an aighneacht a chur TG4 isteach léite go sciobtha agam. Is fiú í a léamh. Beidh mise ag dul ar ais agus á léamh. Bréag a bheadh i gceist dá ndéarfainn go raibh sí léite agam ina iomlán, mar níl. Is aighneacht faoi leith an aighneacht seo maidir le Gaeilge, na meáin chumarsáide agus ról na Gaeilge sna meáin chumarsáide amach anseo. Ba mhaith liom tuairim an Aire Stáit a fháil faoi sin. B’fhéidir nach bhfuil sí léite fós aige, mar níl sí léite agam ina iomlán, ach iarraim air teacht ar ais agam.

Luaigh an tAire Stáit go raibh Bille na dTeangacha Oifigiúla críochnaithe. B’fhéidir go bhféadfadh sé soiléiriú a thabhairt dúinn maidir leis sin. Deir a ráiteas tosaigh, “Tá Bille teanga nua críochnaithe ar Chéim an Choiste sa Dáil chomh maith, dár ndóigh.” Ní leor é sin. Rinne an coiste seo a lán oibre ar an mBille sin. Bhí an tAire Stáit mífhoighneach ó thaobh ráta na hoibre sin ach rinneamar ár ndícheall. Anois tá deireadh na Dála ag druidim linn agus níl tásc ná tuairisc ar an mBille. Ag an bpointe seo, níor mhaith liom an Bille a bheith curtha ar an gclár oibre don tseachtain seo chugainn mar ní bheidh a dhóthain ama againn chun é a phlé agus ní féidir glacadh le gilitín. An bhfuil sé ar intinn ag an Aire Stáit é a chur os comhair na Dála an tseachtain seo chugainn? Níl a fhios agam faoi na Teachtaí eile ach bheinn iomlán míshásta le cinneadh mar sin. Ní chóir é a bhrú os comhair na Dála ag deireadh an tsamhraidh, in ainneoin go bhfuil brú curtha go mion minic agam ar an mBille. Tá gá le díospóireacht cheart ó thaobh an Bhille de. B’fhéidir go mbeidh an tAire Stáit in ann soiléiriú a thabhairt dom faoi na rudaí eile a d’ardaigh mé.