Éamon Ó Cuív (Galway West, Fianna Fail) | Oireachtas source

Tá mé an-bháúil don smaoineamh seo, ach ní mar atá sé sa leasú seo. Níl aon amhras faoi ach go gcaithfimid, luath nó mall, aghaidh a thabhairt ar an easpa coibhnis idir an t-airgead a chaitear ar chraoladh trí Bhéarla agus ar chraoladh trí Ghaeilge. Tá sé ráite go minic agam go bhfuil TG4 agus Raidió na Gaeltachta ar an ngannchuid ó thaobh airgid de.

Tá súil agam go mbeidh comhrá ag an Aire Stáit leis an Aire sinsireach, an tAire Turasóireachta, Cultúir, Ealaíon, Gaeltachta, Spóirt agus Meán, faoi dhíriú ar an gceist seo as seo go dtí Céim na Tuarascála mar go bhfuil éagothromaíocht aisteach ann idir an t-airgead a chuirtear ar fáil do theanga atá ina mhórtheanga ó thaobh lucht labhartha de, ní hamháin in Éirinn ach ar fud an domhain, le hais an méid a chuirtear ar fáil don mhiontheanga. Tá sé níos measa fós nuair a smaoinítear ar an méid stáisiúin Bhéarla átá ann má tá spéis ag duine i gcláir as Béarla agus a bhíonn ar fáil ag an ngnáthdhuine, fiú in Éirinn, má bhíonn Sky nó a leithéid aige. Is cinnte go bhfuil an ceann seo faoi smacht an Aire agus tá súil agam go ngníomhóidh sí air.