Aengus Ó Snodaigh (Dublin South Central, Sinn Fein) | Oireachtas source

Tugadh an treoir ó Oifig na mBillí go bhfuil sé seo dícheadaithe bunaithe ar an tslí atá na Buan-Orduithe scríofa agus ó thaobh na méide atá sa Bhunreacht. Níl a fhios agam cén costas a bheadh i gceist anseo in aon chor. Is comhaid alfa-uimhriúil oifigiúil a eiseofar amach anseo atá i gceist. Sin rud a bheadh déanta ar aon nós ach a bheadh bunaithe ar fhocail nó ar logainmneacha Béarla. Tá sé le teacht mar sin níl aon chostas ann faoi láthair. Ní gá ach é a mhúnlú chun gur féidir leis a bheith dátheangach nó as Gaeilge. Sampla den sórt cóid atá i gceist ná mark index ar na gluaisteáin agus a leithéid nó cóid poist. Bhí damáiste mhór déanta don Ghaeilge nuair a rinneadh an cinneadh sin maidir leis na plátaí cláraithe. D'úsáid siad "D" seachas "BAC" nó "BÁC". Bhí deis againn an Ghaeilge a chur chun cinn ansin. Bhí an deis ceannann céanna againn nuair a bhí Eircode á chur le chéile. An rud a rinneadh ná gur maslaíodh na Gaeilgeoirí uair amháin eile nuair a roghnaíodh "D" le haghaidh Baile Átha Cliath. Bhí sé sin go dona. Bhí an deis againn é sin a dhéanamh agus níor thapaigh muid í. Is trua nach bhfuil an leasú seo in ord agus is ait liom go bhfuil aon chostas i gceist mar is rud atá sa todhchaí a bheadh i gceist anseo.