Mr. Seán Ó Coinn:

Ní fhéadfainn a rá. Tá a fhios agam go bhfuil sé giota maith níos airde ná an líon úsáideoirí a bheadh ag léamh na leaganacha clóite de na nuachtáin roimhe seo ach ní fhéadfainn figiúr cruinn a thabhairt faoi láthair.

Tá an ceart ag an Teachta Ó Cúiv maidir leis an mBille. Ní dóigh liom go rabhamar riamh ag moladh smachtbhannaí a chur ar dhaoine aonair ach is ar chomhlachtaí Stáit a bhíomar ag díriú amhlaidh. Tá siad in úsáid i dtíortha eile agus sa tír seo freisin maidir le cúrsaí GDPR nó Rialachán Ginearálta maidir le Cosaint Sonraí, RGCS, mar a thugaimid air, má sháraíonn duine rialacha a bhaineann leis sin. Is é an rud a bhí i gceist againn go mbeadh an fhoráil sa reachtaíocht a thabharfadh an chumhacht sin don Aire dá mba léir nach raibh ag éirí leis le cuid éigin den reachtaíocht, agus go bhféadfaí an chéim bhreise sin a ghlacadh. Níor ghá go mbeadh sé sonraithe ag an bpointe seo sa reachtaíocht. Is iad sin na pointí uilig, is dóigh liom.