Aengus Ó Snodaigh (Dublin South Central, Sinn Fein) | Oireachtas source

Déanfaimid iarracht arís. Is é sin an fáth go ndúirt mé go bhfuilimid ag déileáil leis. Go dtí seo, tá cuireadh tugtha d'Fhoras na Gaeilge teacht os ár gcomhair an tseachtain seo chugainn. Ó thaobh an tseachtain ina dhiaidh sin agus cruinniú ar an 25 Samhain, tá cuireadh tugtha againn do Chomhlachas na gComharchumainn agus na gComhlachtaí Pobalbhunaithe. Maidir leis an tseachtain ina dhiaidh sin, bhí cuireadh tugtha againn don Aire, an Teachta Catherine Martin, agus don Aire Stáit, an Teachta Chambers, teacht os ár gcomhair. Ina dhiaidh sin, tá cuireadh tugtha againn do Cynthia Ní Mhurchú agus Liam Mac Cóil buaileadh linn mar gheall ar Bhille na dTeangacha Oifigiúla (Leasú), 2019. Maidir lenár gcruinniú deireanach roimh an Nollaig, má chloímid le cruinniú amháin sa tseachtain, buailfimid le Coimisinéir An Gharda Síochána ar an 16 Nollaig. Tá trí chinneadh gur gá dúinn a dhéanamh. An aontaítear leis an gclár oibre mar atá sé faoi láthair? An aontaítear leis go gcuirfear aon rud eile ar leataobh ina iomláine má thosaíonn plé ar Chéim an Choiste an Bhille teanga ag aon am? Faoi láthair tá an sliotán seo againn ar an gCéadaoin. Tá sliotán ar fáil dúinn ar an Déardaoin freisin.

Má táimid ag iarraidh cur chuige ceart maidir leis an mBille, is gá níos mó ná cruinniú amháin sa tseachtain. Muna mbeidh sé sin ann, níl seans ar bith go mbeidh muid in ann mórán dul chun cinn a dhéanamh mar ní bheidh ach trí chruinniú i gceist má thagann an Bille os ár gcomhair ar an 2 Nollaig. An bhfuil aon tuairimí ag comhaltaí?