Aengus Ó Snodaigh (Dublin South Central, Sinn Fein) | Oireachtas source

Tá leithscéal faighte againn ó na Teachtaí Fergus O'Dowd agus Marc Ó Cathasaigh. Iarraim ar na comhaltaí gan dul ina suí in aon chathaoir ag an mbord ach amháin na cinn atá micreafóin curtha ar fáil dúinn os a gcomhair. Mura bhfuil spás ann is féidir suí ar gcúl agus na suíocháin a bhabhtáil ansin.

Maidir le miontuairiscí ár gcruinniú ar an 4 Samhain, tá an rúnaíocht tar éis dréacht díobh a scaipeadh orainn roimh an gcruinniú seo. An aontaítear iad nó an bhfuil aon rud ar mhiste le comhaltaí an choiste a phlé ag an bpointe seo? Mura bhfuil, glacaim go n-aontaítear iad mar sin. Gabhaim buíochas leis na comhaltaí.

Maidir le comhfhreagras, tá roinnt míreanna comhfhreaghrais scaipthe timpeall ar na comhaltaí chomh maith, is iad F038 go F040, a bhfuil baint acu leis an gcruinniú seo de na comhaltaí. Maidir le mír comhfhreagrais F038, sheol Conradh na Gaeilge é chugainn mar gheall go ndúirt an tArd-Rúnaí, Julian de Spáinn, go ndéanfadh sé sin nuair a bhí sé os ár gcomhair an tseachtain seo caite. Baineann sé le polasaí náisiúnta phleanáil tithíochta sa Ghaeltacht. Ar mhian le haon chomhalta é sin a phlé anois nó ar mhaith linn é a chur ar an gclár oibre don bhliain seo chugainn? Is féidir linn é a phlé mar tá an nóta air scaipthe timpeall agus is nóta ocht leathanach ar fad atá i gceist. Glaoim ar an Teachta Ó Cúiv.