Dr. Treasa Kirk:

Mar is eol do na baill, tá dul chun cinn déanta sa Roinn de bharr go bhfuil aonad um oideachas Gaeltachta bunaithe anois. Tá seirbhís ar fáil do na scoileanna Gaeltachta agus do na pobail Ghaeltachta. Feidhmíonn an t-aonad sin trí mheán na Gaeilge. Sin dul chun cinn.

Chomh maith leis sin, ardaíodh ceist faoi na hacmhainní Gaeilge atá ar fáil. Mar is eol do bhaill, tá an-dul chun cinn déanta ag COGG maidir le hacmhainní Gaeilge a chur ar fáil do bhunscoileanna agus iarbhunscoileanna. Le déanaí tá siad ag díriú isteach ar na luathbhlianta chomh maith. Foilsítear leabhrán gach bliain ina liostáiltear na háiseanna uilig atá ar fáil trí mheán na Gaeilge. Tá a lán áiseanna ann. Chomh maith leis sin, maidir leis an PDST agus na seirbhísí tacaíochta atá ar fáil, tá an-chuid dul chun cinn déanta ag an PDST maidir le hacmhainní Gaeilge a chur ar fáil do bhunscoileanna agus d'iarbhunscoileanna Gaeltachta agus lán-Ghaeilge.