Éamon Ó Cuív (Galway West, Fianna Fail) | Oireachtas source

Má dhéanann duine cúrsa Gaeilge, ní hionann é sin agus a rá go mbeidh Gaeilge acu, nó Gaeilge sách maith chun a gcuid oibre a dhéanamh trí mheán na Gaeilge, go mór mór le cainteoirí dúchasacha, faoi rudaí teicniúla ar nós beithígh, bulláin, bodóga, moilt agus gach uile chineál caoirigh. An gcaitheann na daoine a dhéanann cúrsaí Gaeilge scrúdaithe a dhéanamh ag an deireadh a thaispeánfadh go bhfuil caighdeán sách ard Gaeilge acu le déileáil leis an bpobal trí Ghaeilge? Mura bhfuil sé sin ann, is rud deas é go bhfuil Gaeilge áirithe ag daoine ach ní Gaeilge fheidhmiúil í.